1Th 1 | ATA | STEP | Eni Paulo, nexi noxi'a Sailasi ilou Timoti tekaukavunu vaikala ane 'o mulai noxinge ngingi ta mitemau Lataua ne Tesalonika e ngingi ngongi'a Lataua Maminge mo Tila Iesu Kalisito ngepita vilesisi. Nexi talinga lexe alauna mo opo se'isisi noxou Lataua umomomo sou uxolu noxinge.

a 1:1Apo 17:1-9

b 1:31Ko 13:13; Kol 1:4-6

c 1:51Ko 2:4-5

d 1:6Apo 17:5-9

1 Thessalonians 1

1 ^aEni Paulo, nexi noxi'a Sailasi ilou Timoti tekaukavunu vaikala ane 'o mulai noxinge ngingi ta mitemau Lataua ne Tesalonika e ngingi ngongi'a Lataua Maminge mo Tila Iesu Kalisito ngepita vilesisi.

Nexi talinga lexe alauna mo opo se'isisi noxou Lataua umomomo sou uxolu noxinge.

Ane'i Milemo Laixe sou Xaixai Noxi'a ta Tesalonika

2 Nexi taxavutalangengi ngingi latala mo talemo laixe musuku ulai noxou Lataua no voxovoxo utotomu no 'a lakilaka noxixe. 3 ^bMo nexi taxavutalangengi utotomu no iou Lataua Maminge no anu 'ili'ilixo laixe e ngingi ngemuxaxu tangengi noxou la sou nge'oxonu, mo xaixai toxoxa'a e ngingi tangengixa'a ta mitema la sou nge'oxonu sou ngesu'uline'i. Xe taxavutalanu tulungenge pekia'u no anu tu'utu'umaxu xo nga'osasou ngaloopala Tilasinge Iesu Kalisito mine ulivu une'e.

4 Ngingi nge'oxo 'ilixo aloxo ne, xo ngingi ta vivixe e Lataua tanunenge misevile. Nexi telavu lexe anu musosovosinge lexe ngingi ta na'u. 5 ^cXo nexi tea'alomengixu a'alo laixe noxou Iesu, la tavikalangengixu no anu ananexesi uasi. Ia tevikalangengixu no anu xavi mo no anu Uleenu Tavuna, la ngelavu lexe temulaxu tanexi pekia'u no anu ane. Mo ngingi ngelavusou 'ili'ilixo e nexi te'oxonu sou usu'ulingengi no anu voxo ane nexi texolu noxinge ne. 6 ^dNo voxo ane ngingi nge'osasou vaikala noxou Lataua sou ngeno'u xo Uleenu Tavuna muxaxai noxinge, no mine ngingi ngexalisou tu'utu'umaxu tavu'alo ne. La ngingi ngemulimulinu 'ili'ilixo noxixe mo noxou Tilasinge. 7 La sou ngingi ngemaxa'u 'ili'ilixo laixe sou ta mitema latala ane imuxamuxaxu tane'i noxou Iesu no xalee lia tila ne Makedonia mo ne Akaia imaisou la imulinu. 8 Xe vaikala noxou Tila e ngingi ngea'aloxu ne, ulai noxi'a ta mitema ne Makedonia xe ne Akaiasi uasi, mulai noxi'a ta mitema no tuatuala ukalusi loxo xalamo tamaxu ulai noxi'a ta mitema. Mo ane'i milomusou a'alosinge lexe ngingi ngamuxamuxaxu tangengi noxou Lataua. La sou nexi umomomosou tavikalane'i no 'a vaikala vile la uasi. 9 Xo ta mitema me'a ia'alongenge sou mimii ane muxali no mine nexi tene'e noxinge la nge'osasixe. Mo mia'alongenge lexe ngingi nge'ume'a ta lataua sou kalakalavoi mo ngelivu ngene'e noxou Lataua maninasou umauli utotomu sou lexe ngingi ngaxaxai noxou, 10 mo ngingi ngaxomaiou 'Olu Iesu ane musoli ia Lataua mutulusou xe ili'i la molu no opo loxotolo ulu'e mo upamaulinenge no anu la'ia noxou Lataua e unene'e.